Aðeins fjögur almenningssalerni í miðborginni

Aðeins fjögur almenningssalerni eru í miðborg Reykjavíkur og eru tvö þeirra lokuð að hluta eða öllu leyti á næturnar. Lögreglan handtók á þriðja tug manna um helgina fyrir að kasta af sér vatni á almannafæri.

Aðgerðir lögreglu hafa vakið mikla athygli og umtal enda finnst mörgum löngu tímabært að tekið sé á subbuskap og ólátum í miðborginni. Eitt umfram annað hefur þó fengið landann til að skeggræða aðgerðirnar en það eru handtökur lögreglu á fólki sem einhverra hluta vegna sér ástæðu til að kasta af sér þvagi þar sem það stendur þá stundina.

Eins og segir í þekktu dægurlagi þá má ekki pissa bak við hurð en það má heldur ekki pissa utan í hurð eða húsvegg né annars staðar almannafæri. Lögreglan á höfuðborgarsvæðinu handtók því á þriðja tug manna um helgina fyrir það athæfi. Það hefur vakið fólk til umhugsunar um hvar sé hægt að ganga örna sinna í miðborginni.

Á svæðinu sem afmarkast af Frakkastíg og Ingólfstorgi annars vegar og Grettisgötu og Hverfisgötu hins vegar eru þau fjögur, en þetta er það svæði í borginni sem fólk heldur sig mest á um helgar.

Fyrst ber að nefna að í bílastæðahúsinu við Traðarkot eru allgóð almenningssalerni, þá er eitt sjálfvirkt salerni á Vegamótastíg, síðan er hið víðfræga Núll í Bankastræti og loks er sjálfvirkt salerni á Ingólfstorgi. Sá galli er hins vegar á gjöf Njarðar að salernin við Traðarkot eru lokuð á kvöldin og um helgar og Núllið, sem er opið alla virka daga til fimm er aðeins opið á föstudags og laugardagskvöldum frá klukkan 10 til klukkan fjögur á morgnana.

Stefán Eiríksson, lögreglustjóri höfuðborgarsvæðisins sagði í samtali við Fréttastofu það þó ekki vera ástæðu þess að fólk kastaði af sér þvagi á götum úti enda hafi sumir þeirra sem handteknir voru um helgina staðið við hlið almenningssalernis þegar þeir voru handteknir fyrir athæfið.