Ruslfæði eyðileggur matarsmekk fullorðinna

Talsmaður neytenda segir ruslfæði bæði móta neysluvenjur barna og eyðileggja matarsmekk fullorðinna og vísar í danska athugun máli sínu til stuðnings.

Fram kemur á vef talsmannsins að hann vinni ásamt umboðsmanni barna að því að semja við hagsmunasamtök atvinnurekenda og helstu ljósvakamiðla landsins um að takmarka auglýsingar á óhollri matvöru gagnvart börnum. Meðal þeirra eru Samband íslenskra auglýsingastofa, Samtök fjármálafyrirtækja, Samtök verslunar og þjónustu, Viðskiptaráð, Ríkisútvarpið, 365 og Skjár Einn.

Talsmaður neytenda bendir í þessu sambandi á frétt í vef Berlingske Tidende í gær en þar var sagt frá danskri athugun sem sýnir að ruslfæði hafi ekki aðeins áhrif á lýðheilsu heldur verði neytendur smám saman „ólæsir" á góðan mat eins og það er orðað. Vítahringur valdi því að því meira ruslfæðis sem neytt sé því erfiðara sé að muna að matur geti bragðast á annan hátt.