Fullur og ökuréttindalaus á bíl með sex manns í annarlegu ástandi

Lögreglan á höfuðborgarsvæðinu stöðvaði í gær 18 ára pilt Grafarvogi vegna gruns um ölvunarakstur. Sá reyndist aldrei hafa öðlast ökuréttindi og þá voru sex manns í bílnum með honum, sem allir voru í annarlegu ástandi.

Enn fremur voru tveir ökumenn teknir fyrir að aka undir áhrifum fíkniefna í gærkvöld. Fyrst var kona um tvítugt stöðvuð fyrir þær sakir í Breiðholti og síðan var tæplega þrítugur karl stöðvaður af sömu ástæðu í Hafnarfirði. Í bíl hans fundust ætluð fíkniefni en ökumaðurinn og farþegi hans, karl á líkum aldri, voru báðir færðir á lögreglustöð en sá síðartaldi reyndist jafnframt vera eftirlýstur fyrir aðrar sakir.