Áfrýjar sýknu í tálbeitumáli til Hæstaréttar

Ríkissaksóknari hyggst áfrýja sýknudómi yfir þremur karlmönnum sem allir settu sig í samband við tálbeitu Kompás í vor. Mennirnir hugðust hitta tálbeituna sem þeir töldu vera 13 ára stúlku í kynferðislegum tilgangi.

Í janúar á þessu ári setti tálbeita fréttaskýringaþáttarins Kompás auglýsingu á einkamál.is. Yfir hundrað karlmenn höfðu samband við það sem þeir töldu vera þrettán ára gamla stúlka, meirihluti þeirra í kynferðislegum tilgangi. Eftir nokkur samskipti á samskiptaforritinu msn komu fimm mannanna heim til stúlkunnar þar sem ritstjóri Kompáss tók á móti þeim.

Miklar umræður fóru af stað í þjóðfélaginu, meðal annars á Alþingi um hvort lögreglu ætti að vera heimilt að nota tálbeitu á þennan hátt og hvort tilraunaákvæði almennra hegningarlaga myndi ná yfir brotið. Lögreglan krafði Kompás um öll gögn sem þáttargerðarmenn bjuggu yfir um málið og í kjölfarið afhentu þeir lögreglu netföng og ljósmynd af mönnunum sem og afrit af þættinum sjálfum eins og hann birtist í sjónvarpi.

Rannsókn lögreglu leiddi svo til þess að þrír mannanna voru ákærðir fyrir tilraun til kynferðisbrots. Héraðsdómur Reykjavíkur sýknaði mennina í fyrradag meðal annars á þeim grundvelli að ekki væri hægt að nota gögnin sem lögregla fékk frá Kompási þar sem lögreglu er óheimilt samkvæmt reglugerð að beita tálbeitu við gagnaöflun.

Ríkissaksóknari hefur nú ákveðið að áfrýja dómnum til Hæstaréttar. Þar á bæ telja menn reglugerðina sem sýknudómurinn byggir á ekki eiga við gögn Kompáss heldur eingöngu við gögn sem lögregla aflar með notkun tálbeitu.

Rannsókn á hendur hinum tveimur sem komu á fund tálbeitunnar stendur enn yfir, meðal annars yfir Ágústi Magnússyni sem var að ljúka 5 ára afplánun á dómi á Vernd fyrir kynferðisbrot gegn 5 drengjum.