Strætó harmar atburðinn í leið 13

Framkvæmdastjóri Strætó bs, Reynir Jónsson, segir að fyrirtækið harmi þá atburði sem áttu sér stað í leið 13 á dögunum þegar vagnstjóri brást ókvæða við beiðnum konu sem bað hann um að fara sér hægar. Vagnstjórarnir sem um ræðir hafa viðurkennt mistök sín. Þá er því beint til konunnar sem hlut átti að máli að hún gefi sig fram við Strætó svo hægt sé að biðja hana persónulega afsökunar.

Þá kemur fram í tilkynningunni að við rannsókn á ökulagssíritum vagnsins hafi komið í ljós að vagninn hafi ekki farið yfir leyfilegan hámarkshraða á þeim tíma sem um ræðir.

Tilkynningin frá Strætó bs.er hér fyrir neðan í heild sinni.

„Í kjölfar fréttar sem birtist á vísi.is þann 24. október sl. varðandi uppákomu í leið 13 viljum við láta eftirfarandi frá okkur fara:

Við viljum byrja á því að biðja alla hlutaðeigandi farþega afsökunar á þessu og hörmum að þessi atburður hafi gerst - sér í lagi þá konu sem um ræðir. Myndum við gjarnan vilja að hún gæfi sig fram við okkur svo við getum komið á framfæri við hana afsökun okkar. Við höfum jafnframt rætt við hlutaðeigandi vagnstjóra og viðurkenna þeir mistök í málinu og vilja einnig biðja hlutaðeigandi farþega afsökunar á framferði sínu.

Við höfum yfirfarið ökulagssírita vagnsins á ferð hans á þessum tíma sem um ræðir og viljum taka það skýrt fram að hann fór ekki yfir löglegan hámarkshraða né braut á þeim viðmiðum sem við höfum sett um ökulag. Umræddur biðtími sem vitnað er til í fréttinni var innan við 60 sekúndur skv. ökulagsrita.

Vert er að benda hinum almenna borgara á að erfitt getur verið að sneiða framhjá þeim fjölmörgu hraðahindrunum - hvort heldur er í formi upphækkana eða þrenginga - sem eru á þessari leið. Þessar hraðahindranir verða því miður oft til þess að hjól vagnanna vilja fara yfir þessa kanta með tilheyrandi höggum og titringi."

Fréttina af uppákomunni má lesa hér.