Íslendingar gætu þurft að draga verulega úr flugumferð

Íslensk flugfélög gætu þurft að draga verulega úr flugumferð ef tillögur Evrópusambandsins um takmörkun á útblæstri flugvéla ná fram að ganga. Flugmálastjóri segir tillögurnar vera ósanngjarnar gagnvart Íslendingum og að þær gangi illa upp.

Tillögurnar gera ráð fyrir því að settir verði kvótar á útblástur flugvéla en markmiðið er að reyna draga úr mengun af völdum flugumferðar og ýta undir notkun lesta og annarra minni mengandi samgöngutækja.

Samkvæmt þeim verður flugfélögum úthlutaður útblásturskvóti sem miðast við 90 prósent af heildarútblæstri tiltekins flugfélags á árunum 2004 til 2006. Þing Evrópusambandsins fjallaði um tillögurnar í síðustu viku og var þeim vísað í nefnd til frekari vinnslu. Er gert ráð fyrir því að þær taki gildi árið 2011.

Pétur K. Maack, flugmálastjóri, segir einboðið að gangi tillögu óbreyttar í gegn muni íslensk flugfélög neyðast til að draga verulega úr farþegaflugi.

Allar flugvélar sem eru undir 20 tonnum að þyngd verða þó undanþegnar útblásturskvóta. Pétur segir ljóst að þetta þýði að flugfélög innanlands þurfi að taka minni vélar í notkun.

Jón Karl Ólafsson, forstjóri Icelandair, sagði í samtali við fréttastofu í dag að flugfélög í Evrópu hefðu almennt lagst gegn þessari tillögu. Hann telur um dulbúna skattheimtu að ræða og segir líklegt að félög þurfi að versla sín á milli með útblásturskvóta sem síðan muni skila sér í hærri flugfargjöldum til farþega.