Brutust inn og stálu níu svalafernum á Siglufirði

Þrír piltar voru dæmdir í Héraðsdómi Norðurlands vestra fyrir þjófnað í dag. Piltarnir brutust inn í skíðaskála Skíðafélags Siglufjarðar í Skarðsdal á Siglufirði og stálu þaðan 8 talstöðvum af gerðinni Topcom með hleðslutækjum, vefmyndavél, tveimur Peavy hátölurum fyrir kallkerfi, ADSL afruglara með fjarstýringu, drifreim fyrir snjósleða, tvennum skíðagleraugum og níu svalafernum.

Einn piltanna hefur áður komist í kast við lögin og hlaut hann 30 daga fangelsi en fullnustu refsingarinnar er frestað og skal hún niður falla að liðnum tveimur árum haldi hann skilorð. Ákvörðun refsingar hinna tveggja er einnig frestað.

Skíðafélagið fór fram á bótakröfu upp á 155.146 krónur en drengirnir þurfa að greiða 28. 732 krónur.