REI og GGE áttu hæsta tilboðið

Reykjavik Energy Invest, Geysir Green Energy og samstarfsaðili þeirra First Gen Corporation átti hæsta tilboð í sextíu prósenta hlut filippseyska ríkisins í stærsta jarðavarmafyrirtæki Filippseyja, PNOC-EDC. Eftir því sem fram kemur í filippseyskum fréttamiðlum hljóðaði tilboðið upp á 58,5 milljarða pesóa eða rúma 84 milljarða íslenskra króna.

Bjarni Ármannsson, stjórnarformaður REI, sagði í samtali við Vísi að hann gæti ekkert tjáð sig um málið. Það væri enn í ákveðnu ferli.

Tilboð íslensku fyrirtækjanna og hins filippseyska First Gen var gert í nafni Red Vulcan Holdings en tilboðum átti að skila í dag. Eftir um þriggja tíma yfirlegu yfir tilboðunum kom í ljós að tilboð Red Vulcan var hæst.

Þrír aðrir aðilar voru lokahópi félaga sem gátu boðið í hlutinn en það vpru fyrirtækin AP Renewables, FDC Geo-Energy Holdings og Panasia Energy Holdings. Yfirvöld á Filippseyjum höfðu sagt að lágmarkstilboð í hlutinn væri 45 milljarðar pesóa en FDC hafi átt næsthæsta tilboð eða 48,5 milljarða pesóa.

Fram kemur að einkavæðingarnefnd Filippseyja muni leggjast yfir tilboð Red Vulcan og tilkynna á morgun hvort samið verði við félagið.

Í raun er um að ræða 40 prósenta hlut í PNOC-EDC en honum fylgir 60 prósent af atkvæðarétti í félaginu. Ljóst er að REI og GGE munu ekki eignast meirihluta í félaginu því þau skilyrði eru sett fyrir kaupunum að innlendur aðili eigi 60 prósent af þeim hlut sem boðinn er út.