Sala á tóbaki eykst þrátt fyrir reykingabann

Sala á tóbaki hefur aukist á Íslandi eftir að reykingabann var tekið upp á veitingastöðum. Mjög skiptar skoðanir eru um bannið.

Sala á sígarettum jókst um 6,3% í júní og júlí miðað við söluna í fyrra samkvæmt upplýsingum frá ÁTVR. Þetta er meiri aukning en á ársvísu síðan í fyrra og á skjön við söluþróun í Bretlandi. 1. júlí síðastliðinn gekk reykingabann í gildi þar í landi og minnkaði sígarettusala strax um 7%.

Einar Geirsson veitingamaður á Kaffi Karólínu á Akureyri segir þetta stórfurðulegar niðurstöður og sýni að bannið sé rugl. Einar telur að veturinn verði vertum og veitingahúsum erfiður vegna bannsins, og hann hefði viljað að banninu yrði rift.