Hæstiréttur fellst á flýtimeðferð gegn Samkeppniseftirlitinu

Hæstiréttur féllst í dag á beiðni Mjólkursamsölunnar, Auðhumlu og Osta- og smjörsölunnar um flýtimeðferð á máli sem fyrirtækin hafa höfðað gegn Samkeppniseftirlitinu. Fyrirtækin krefjast þess að forstjóri Samkeppniseftirlitsins og aðrir starfsmenn víki sæti við rannsókn sem nú stendur yfir á ætluðum brotum fyrirtækjanna gegn samkeppnislögum.

Áður hafði Héraðsdómur Reykjavíkur synjað fyrirtækjunum um flýtimeðferð í málinu, en Hæstiréttur snéri þeim úrskurði við í dag. Í dómsorði er lagt fyrir héraðsdómara að gefa út stefnu til flýtimeðferðar í málinu.

Samkeppniseftirlitið gerði húsleit hjá umræddum fyrirtækjum þann 5. júní síðastliðinn. Því er haldið fram að forstjóri Samkeppniseftirlitsins hafi látið ákveðin ummæli falla, bæði fyrir og eftir húsleitina, sem geri forstjórann, Pál Gunnar Pálsson og fleiri starfsmenn stofnunarinnar vanhæfa til þess að rannsaka meint brot fyrirtækjanna.