Grafarholtsbúar hafa dýralækni en ekki heilsugæslustöð

Íbúar í Grafarholti og nærliggjandi hverfum geta nýtt sér þjónustu dýralæknis í hverfinu en hafa ekki heilsugæslustöð. Sem stendur er þeim bent á heilsugæslustöðina í Árbæ en hún er of lítil til að sinna öllu svæðinu. Að sögn Guðmundar Einarssonar forstjóra Heilsugæslu Reykjavíkur stendur til að stöðin í Árbæ verði stækkuð á næsta ári.

"Á meðan þetta ástand varir höfum við bent fólki í Grafarholti og Norðlingaholti að afskrá sig ekki úr fyrri heilsugæslustöð og nýta sér þá heilsugæslu sem þeir höfðu áður en það flutti í nýju hverfin," segir Guðmundur Einarsson. "Auk þess bendum við fólki á að nýta sér heilsugæslustöðvar í nágrannabyggðunum eins og til dæmis Mosfellsbæ."

Fram kemur í máli Guðmundar að stækkun heilsugæslunnar í Árbæ eigi að vera komin í gagnið um mitt næsta ár. Í Grafarholti búa nú hátt í 5.000 manns en hverfið er enn talið of lítið fyrir eigin heilsugæslustöð. "Við miðum við að sex til sjö læknar starfi á hverri heilsugæslustöð og að baki þeim sé um 10.000 manns byggð," segir Guðmundur.