Keyrði á kyrrstæða rútu við Flosagjá

Lögreglan á Selfossi handtók á laugardag mann eftir skrautlegan akstur í þjóðgarðinum á Þingvöllum. Maðurinn hafði ekki meiri stjórn á bifreiðinni en svo að hann ók á rútu sem var kyrrstæð á bifreiðastæði við Flosagjá.

Hann sinnti því engu heldur ók á brott án þess að setja sig í samband við rútubílstjórann. Að sögn lögreglu komst hann þó ekki langt því hann ók út af veginum og komst ekki lengra. Þar var hann handtekinn og færður í lögreglustöð þar sem tekið var frá honum blóð- og þvagsýni vegna gruns um ölvunarakstur.