Krafa um að nemendur kaupi ákveðna vörutegund

Kennurum er í sjálfsvald sett hvað þeir biðja nemendur sína að kaupa fyrir skólann. Dæmi eru um að kennarar fari fram á það að nemendur kaupi rándýrar merkjavörur.

Engar reglur eru til um hvað kennarar geta farið fram á nemendur kaupi fyrir skólann. Flestir krakkar eiga að kaupa þetta venjulega, stílabækur, blýanta og strokleður.

Þess eru dæmi að nemendur eru beðnir um að kaupa sérstakar litategundir eins og NeonColor sem kosta um 1300 krónur. Nína Hjaltadóttir, verslunarstjóri í Griffli segir að þegar foreldrum hafi verið bent á samskonar liti, en mun ódýrari þá hafi kennarar sent krakkana með þá aftur í búðina til að skila þeim og það er ekki allt. Sumir kennarar fara fram á það að nemendur kaupi sérstakar tegundir af möppum, blýöntum, strokleðrum og fleira í þeim dúr. Segja verslunarmenn það jafnast á við það að farið yrði fram á að börn keyptu Speedo sundbol fyrir sund og mættu aðeins í fötum sem fást í Sprotmanninnum í leikfimi.

Nína segir engar eðlilegar skýringar vera á því hvers vegna kennarar biðja um ákveðin vörumerki. Biðji þeir um sérstaka vörutegund t.d. af möppum mætti halda að ástæðan væri eingöngu sú að það líti betur út í hillum skólastofunnar.