RJF vill bjarga fleirum

Einar S. Einarsson, talsmaður RJF hópsins, segir að stjórn hópsins hafi áhuga á því að bjarga fleira fólki sem lent hefur í hremmingum. RJF hópurinn háði ötula baráttu fyrir frelsi Arons Pálma Ágústssonar eins og þekkt er. Þetta er ekki í fyrsta skipti sem RJF hópurinn lyftir grettistaki í mannréttindamálum. Skákssnillingurinn Bobby Fischer flutti til landsins árið 2004 fyrir tilstuðlan þeirra. Einar segir að RJF hópurinn ætli að hittast í hádeginu í dag og fagna frelsi Arons.

„Við höfum fengið fjölmargar áskoranir um verkefni sem við gætum tekið að okkur. Það er mikið um misrétti í heiminum," segir Einar. Hann leggur áherslu á að félagsmenn RJF hafi áhuga á því að berjast fyrir mannréttindum í heiminum.