Notuðu íbúa sem tilraunadýr við einkavæðingu orkufyrirtækjanna

Minnihluti bæjarstjórnar Reykjanesbæjar gagnrýnir meirihluta sjálfstæðismanna harðlega í yfirlýsingu í tilefni samkomulags um Hitaveitu Suðurnesja. Að sögn minnihlutans var ekkert samráð haft við þá í sölu- og samningaferlinu og telja þeir sjálfstæðismenn hafa notað íbúa sveitarfélagsins sem tilraunadýr við einkavæðingu orkufyrirtækjanna.

Í yfirlýsingu A-listans í bæjarráði Reykjanesbæjar kemur fram að fulltrúar flokksins hafi greitt atkvæði gegn því að bæjarfélagið taki lán hjá Geysi Green Energy ehf. til að nýta sér forskaupsrétt í Hitaveitu Suðurnesja. Þá segja þeir að sjálfstæðismenn hafi frá upphafi ætlað að framselja forkaupsréttarhlut sinn í hitaveitunni og 5 prósenta eignarhlut þrátt fyrir að bæjarstjórinn hafi gefið annað í skyn.

Þá segir ennfremur í yfirlýsingunni að minnihluti bæjarstjórnar Reykjanesbæjar hafi ekki verið hafður með í ráðum í málinu og öll vitneskja hafi verið fengin úr fjölmiðlum eða frá ótengdum aðilum. Þeir gagnrýna sjálfstæðismenn fyrir að nota Suðurnesjamenn sem tilraunadýr við einkavæðingu orkufyrirtækja.

Að mati minnihlutans í Reykjanesbæ hafa bæjarstjórnir á Suðurnesjum algjörlega burgðist í þessu máli og tekið skammtímasjónarmið fram yfir framtíðarhagsmuni íbúanna. Með þessu gjörningi hafi verið gefið út skotleyfi á HS og íbúa Suðurnesja með ófyrirséðum afleiðingum.