Flutningsjöfnunarsjóður olíuvara ekki lagður niður

Björgvin G. Sigurðsson viðskiptaráðherra segir að hætt hafi verið við að leggja niður flutningsjöfnunarsjóð olíuvara eins og til stóð samkvæmt fjárlögum.

Ráðherra sagði í fyrirspurnartíma á Alþingi í dag að ekki væri ráðlagt að leggja sjóðinn niður í ljósi erfiðrar stöðu margra minni sveitarfélaga úti á landi. Fara þyrfti betur yfir hvaða áhrif það hefði á landsbyggðina að leggja niður sjóðinn.

Það var Birkir Jón Jónsson, þingmaður Framsóknarflokksins, sem spurði ráðherra um málið. Hann benti á að bensínlítrinn væri allt að sjö krónum dýrari á Þórshöfn á Norðausturlandi en í Reykjavík. Fagnaði hann því að ráðherra hefði horfið frá því að leggja niður sjóðinn.

Ráðherra svaraði því til að hann, samgönguráðherra og iðnaðarráðherra hefðu ákveðið að stofna starfshóp um flutningsjöfnunarstyrki til þess að útfæra flutningsjöfnunarkerfi fyrir landshlutana. Það þyrfti að jafna stöðu landshlutanna til þess að ákjósanlegt yrði að búa annars staðar en á höfuðborgarsvæðinu.