Vilja aðeins semja til eins og hálfs árs

Samiðn vill ekki semja nema til eins og hálfs árs í mesta lagi og miðar kröfur sínar við kaupmátt en ekki prósentur.

Þetta kom fram þegar samtökin kynntu Samtökum atvinnulífsins kröfur sínar í morgun. Að sögn Finnbjörns A. Hermannssonar, formanns Samiðnar, er ekki verjandi að semja til lengri tíma við núverandi aðstæður, eða vaxandi verðbólgu og mikla spennu á vinnumarkaði.

Af sömu sökum voru almennar launakröfur ekki tilgreindar í prósentum heldur verða þær vegnar út frá kaupmáttarauka. Þá er lögð áhersla á að hækka launataxta umfram almennar launahækkanir, til þess að vinna upp það sem taxtafólk hefur dregist aftur úr í launaskriðinu.

Nýjung í kröfugerðinni er að allir beri vinnustaðaskilríki sem tilgreini að þeir séu skráðir hér á landi og hvaða réttindi þeir hafi. Þetta muni tryggja að viðkomandi hafi þau réttindi sem neytandinn óskaði eftir og koma í veg fyrir að réttindalausir útlendingar séu að ganga í störfin.

Að sögn Finnbjörns verður nú farið yfir sameiginlega þætti með ASÍ og ættu formlegar viðræður við Samtök atvinnulífsins að geta hafist í næstu viku. Stefnt væri að því að ná samningum fyrir áramót.