Samtök ferðaþjónustunnar leggjast gegn Bitruvirkjun

Samtök ferðaþjónustunnar leggjast gegn fyrirhugaðri Birtuvirkjun sem Orkuveita Reykjavíkur hyggst reisa á Hellisheiði.

Fram kemur í fréttabréfi samtakanna að þau hafi sent Skipulagsstofnun athugasemdir vegna áætlananna og bent á að Bitrusvæðið, Ölkelduhálsinn og dalirnir allt í kring séu mjög verðmætt svæði. Vilja samtökin leggja höfuðáherslu á að þetta svæði verði afmarkað fyrir ferðaþjónustu og útivist eingöngu. Vekja Samtök ferðaþjónustunnar athygli á að VSÓ ráðgjöf bendi á í sinni frummatsskýrslu að áhrif Bitruvirkjunar á núverandi ferðaþjónustu og útivist verði talsverð.

„Á þessu ári er líklegt að nálægt hálfri milljón ferðamanna heimsæki Ísland og skapi allt að 60 milljarða króna í gjaldeyristekjur. Samtök ferðaþjónustunnar vilja undirstrika að hér er um að ræða svæði í næsta nágrenni höfuðborgarinnar sem er eitt mikilvægasta svæði ferðaþjónustunnar vegna skemmri ferða," segir í frétt Samtaka ferðaþjónustunnar.

Þá er bent á að svæðið sé líka mjög mikilvægt útivistarsvæði fyrir höfuðborgarbúa vegna nálægðar við Reykjavík.