Afnemur gjöld vegna mjólkurvara

Einar K. Guðfinnsson landbúnaðarráðherra hefur lagt fram frumvarp á Alþingi um að svokallað verðmiðlunargjald og verðtilfærslugjald, sem lagt hefur verið á hvern mjólkurlítra sem lagður er inn í afurðarstöð innan greiðslumarkskerfisins, verði afnumið.

Samkvæmt lögum hefur verðmiðlunargjaldið numið 0,65 krónum á mjólkurlítrann en verðtilfærslugjaldið 2,65 krónum. Verðmiðlunargjaldið hefur hingað til verið notað meðal annars sem rekstrarstyrkir til afurðastöðva og til að jafna flutningskostnað framleiðenda en verðtilfærslugjaldið hefur aftur á móti verið notað til að lækka verð tiltekinna afurða í heildsölu.

Fram kemur í athugasemdum með frumvarpinu að markmið þess sé að stuðla að minni afskiptum ríkisvaldsins af framleiðslu og vinnslu mjólkurafurða og bregðast við athugasemdum Samkeppniseftirlitsins um að jafna samkeppnisstöðu afurðastöðva.

Þar segir einnig að vegna breytinga á umhverfi mjólkuriðnaðarins, meðal annars með aukinni hagræðingu, sé ekki lengur talin þörf fyrir verðmiðlun og verðtilfærslur. Því þurfi ekki að tryggja þann kostnað sem gjöldunum var ætlað að mæta. Afurðarstöðvarnar þurfa því ekki lengur að greiða þetta gjald en taka á sig kostnað vegna þessa, en hann nam rúmum 380 milljónum króna samkvæmt fjárlögum þessa árs.