Óvíst um fjármagn til leitar að ristilkrabbameini

Formaður fjárlaganefndar, Gunnar Svavarsson, vill ekkert um það segja hvort nægilegir fjármunir verði lagðir í hópleit að ristilkrabbameini til að leitin geti hafist strax á næsta ári.

Í kvöldfréttum Stöðvar tvö í gær var rætt við meltingarsérfæðing og yfirlækni á St. Jósefsspítala, Ásgeir Theódórs, sem sagði að á annan tug mannslífa gæti bjargast á hverju ári ef hópleit að ristilkrabbameini yrði komið á laggirnar. Jafnframt sagði hann leit geta sparað ríkinu hundruð milljóna króna á ári.

Að jafnaði greinast 93 manneskjur á ári með meinið og um 55 deyja árlega. Tillaga var samþykkt á þingi í vor um að hefja hópleit á næsta ári en það tekst ekki miðað við það fé sem úthlutað var til verksins, eða 20 milljónum. Áætlað er að leitin geti kostað 140-160 milljónir króna árlega.

Fréttastofa hafði samband við Gunnar Svavarsson, formann fjárlaganefndar, í morgun. Hann sagði nefndina nú fara yfir þúsundir verkefna fyrir aðra umræðu fjárlagafrumvarpsins, sem verður í lok nóvember. Hann kvaðst ekki tjá sig um einstaka verkefni, en nefndin myndi kynna sér þetta mál eins og önnur.