Rúmlega 21 prósent barna finnst þau of feit

Um 21 prósent stráka og 23 prósent stúlkna í 7. bekk finnst þau vera of feit samkvæmt niðurstöðum nýrrar íslenskrar rannsóknar á líðan og lífi íslenskra barna í 5., 6. og 7. bekk. Rannsóknin Ungt fólk 2007 - grunnskólanemar var birt í dag, en hún er unnin af Rannsóknum og greiningu. Í henni kemur einnig fram að 11 prósent barna finnst þau of mjó.

Flest börn eyða miklum tíma með foreldrum sínum og eiga greiðan aðgang að stuðningi og umhyggju þeirra. Þó segjast 21-27 prósent drengja næstum aldrei eiga samræður við alla í fjölskyldu sinni. Þar er munur á milli kynja, því 14-18 prósent stúlkna segja sömu sögu.

Samkvæmt rannsókninni eru stúlkur líklegri til að vera einmana en strákar, 15-17 prósent stúlkna segjast hafa verið einmana dagana fyrir rannsóknina á meðan hlutfallið er 8-12 prósent hjá piltum.

Rúmlega 20 prósent barnanna segjast hafa átt erfitt með svefn að einhverju leyti dagana fyrir könnunina. Fá börn segjast hafa orðið fyrir einelti en nokkuð fleiri telja sig fórnarlömb eineltis, eða 2-4 prósent. Í rannsókninni kemur fram að stríðni fari að mestu leiti fram á skólalóðinni.

Þá kemur fram að strákum sé síður hrósað en stelpum. Bæði af kennurum og öðrum fullorðnum. Þetta á við í öllum aldurshópum rannsóknarinnar.

Niðurstaða rannsóknarinnar er sú að flestum börnum á aldursbilinu líður vel og eru studd af foreldrum sínum. Þau eiga góða vini og hafa jákvæða hluti fyrir stafni.

Rannsóknin snertir líðan, menntun, menningu, tómstundir, íþróttaiðkun og framtíðarsýn íslenskra barna. Hún var gerð meðal tæplega 11 þúsund nemenda í þessum aldursflokki sem er 82 prósent skráðra nemenda á landsvísu.