Tíu sveitarfélögum boðið að kanna möguleika á netþjónabúum

Fjárfestingastofa hefur boðið tíu sveitarfélögum að taka þátt í athugun á aðstæðum til reksturs netþjónabúa á svæðunum. Talið er að Ísland hafi þýingarmikið samkeppnisforskot á þessu sviði.

Fjárfestingastofa gerir þetta í framhaldi af athugun á samkeppnishæfni Íslands við helstu samkeppnislönd. Hún náði meðal annars til orkuöryggis, gagnaflutnings, veðurfars og rekstraröryggis.

Niðurstaðan bendir ótvírætt til að Ísland hafi samkeppnisforskot í þýðingarmiklum atriðum. Sveitarfélögin sem Fjárfestingastofa hefur boðið þátttaka í athugunum og fjárframlag til þeirra eru Reykjanesbær, Sandgerði, Grindavík, Hafnarfjörður, Ölfus, Árborg, Fljótsdalshérað, Akureyri, Skagafjörður og Ísafjarðarbær.

Þar á að kanna lóðir eða landsvæði á hverjum stað og jafnvel húsakynni, sem fyrir eru, og aðgengi að vatni til kælingar. Þá verður öryggi við flutning orku og gagna sérstaklega kannað. Stefnt er að því að athugunum ljúki í janúar næstkomandi.