Lögreglan taki á mistökum sínum

Lögregla og skotvopnasali gerðu mistök þegar manni sem varð öðrum að bana á Sæbraut í sumar, var afhent vopn. Þetta segir móðir unga mannsins sem myrtur var og vill hún að lögreglan taki á mistökum sínum.

Ungi maður var myrtur í júlí í sumar af karlmanni sem keypti skotvopn í verslun í Reykjavík sem hann fékk afhent án þess að hafa til þess tilskilin leyfi.

Í fréttum okkar í gær kom fram að lögregla ætlaði ekki að aðhafast frekar í þessu máli. Marta Bjarnadóttir, móðir unga mannsins, er alls ekki sátt við þær upplýsingar og segir það til skammar að lögreglan telji málið upplýst.

Hún er jafnframt undrandi á því sem haft er eftir ríkissaksóknara í fréttum Stöðvar 2 í gær þess efnis að ekki sé allt refsivert sem aflaga fari. Marta segir þessi ummæli sérlega einkennileg þegar verið er að fjalla um mál af þessari stærðargráðu.

Stefán Eiríksson lögreglustjóri í höfuðborginni sagði við Stöð 2 í gær að enginn hefði verið áminntur í tengslum við þetta mál og hann hygðist ekki tjá sig frekar um það.

Í dag sagði hann hins vegar að lögreglan muni upplýsa aðstandendur að eigin frumkvæði um endanlegar niðurstöður í málinu, þegar þær liggi fyrir, ásamt því að gera ríkissaksóknara grein fyrir niðurstöðunum.

Marta segir að hvorki sonur sinn né gerandinn verði kallaðir aftur til lífsins, þeir séu báðir fórnarlömb í málinu. Hún finni til með aðstandendum gerandans. Hún segist ætla að halda áfram að vinna að því að upplýsa allt sem gerðist í aðdraganda atviksins á Sæbraut.

Marta segist ekki vita hvort svona tilvik hafi hent áður að menn fái að kaupa vopn án þess að hafa til þess leyfi. Hún segir þó að það geti gerst aftur verði ekki tekið á þessum mistökum nú.