Íslensk bæjarfélög gætu nýtt sér orkusparnað

Vel er hugsanlegt að íslensk bæjarfélög nýti sér þjónustu íslensks hugbúnaðarfyrirtækis sem sérhæfir sig í orkusparnaði og stjórnar meðal annars götulýsingu í Amsterdam.

Í fréttum okkar í gær sögðum við frá Íslenska hugbúnaðarfyrirtækinu DomesticSoft sem sérhæfir sig í orkusparnaði. Fyrirtækið fjarstýrir meðal annars götulýsingu í Amsterdam og Luxemborg frá höfuðstöðvum sínum í Mosfellsbæ. Í Noregi stýrir það orkunotkun í um 400 opinberum byggingum og ýmis verkefni eru á vegum þess í Bretlandi og á Írlandi.

Vilhjálmur Þ. Vilhjálmsson borgarstjóri segir að Orkuveitan hafi fylgst náið með þróun þessara mála hjá fyrirtækinu. Hjá borginni sé stöðugt unnið að orkusparandi aðgerðum meðal annars í skólum og íþróttamannvirkjum. Hann segir að meðal annars hafi verið ákveðið að lýsa ekki upp ráðhúsið á nóttunni til að spara nokkrar milljónir.

Hann segir að stefna borgarinnar sé að hafa götur og önnur svæði tiltölulega vel upplýst að vetri til.

Árni Sigfússon bæjarstjóri í Reykjanesbæ útilokar ekki að Reykjanesbær nýri sér þjónustu fyrirtækisins. Hann telur þessa tækni mjög áhugaverða.

Hann segir að þó þurfi að bera saman kostnað við lýsingu og ýmsan annan kostnað eins og við tæknibúnað.