Vörubíll valt við Kolviðarhól, ökumaður fluttur á slysadeild

Vörubíll valt skammt frá Hellisheiðarvirkjun, við Kolviðarhól á níunda tímanum í kvöld. Einn maður var í bílnum og var hann fluttur á slysadeild til aðhlynningar en hann var með meðvitund.

Tilkynning um slysið barst Slökkviliði höfuðborgarsvæðisins klukkan 20:50 í kvöld og fór tækjabíll ásamt neyðarbíl og sjúkrabíl á staðinn. Slökkviliðsmenn frá Selfossi og Hveragerði mættu einnig á slysstað og að sögn vakstjóra hjá SHS unnu liðin að því saman að ná manninum út úr bílnum.

Að svo stöddu er ekkert vitað um tildrög slyssins.