Óheppilegt að gefa umsagnir um hugsanlega samstarfsmenn

Það er óheppilegt að dómarar við Hæstarétt gefi umsögn um tilvonandi samstarfsmenn sína og hafi þar með áhrif á hverjir skipaðir eru hæstaréttadómarar. Þetta segir formaður Lögmannafélags Íslands, sem vill að umsögn um tilvonandi hæstaréttadómara verði í höndum fagráðs en ekki dómara við réttinn.

Við skipan nýs dómara við hæstarétt þarf dómsmálaráðherra lögum samkvæmt að leita umsagnar dómara sem starfa við Hæstarétt um hæfni og hæfi umsækjenda. Dómararnir gefa þar með umsögn um hugsanlega framtíðar samstarfsmenn sína. Ekki eru allir á eitt sáttir með þetta fyrirkomulag en þeirra á meðal er formaður Lögmannafélags Íslands. Hann vill að í stað umsagna hæstaréttardómara verði skipað sérstakt fagráð sem gefi umsagnirnar.