Sérsveitin gerði húsleit í Hveragerði og í Ölfusi

Lögregla á Selfossi naut aðstoðar sérsveitar Ríkislögreglustjóra í dag þegar framkvæmd var húsleit hjá pari á þrítugsaldri í Hveragerði auk þess sem leitað var á vinnustað þeirra í Ölfusi. Lögregla verst frétta af málinu, segir að verið sé að vinna í því. Aðspurð hversvegna sérsveitin hafi verið kölluð til segir lögregla að það hafi verið til styrkingar, en ekki hafi leikið grunur á því að fólkið væri hættulegt.

Parið var handtekið fyrr í dag og þá fannst á þeim amfetamín. Í framhaldi var gerð húsleit í húsi í Hveragerði þar sem fólkið hafði verið gestkomandi auk þess sem leitað var á vinnustað þeirra sem mun vera í Ölfusi.