Vill lækka hámarkshraða við Borg í Grímsnesi

Ólafur Helgi Kjartansson, sýslumaður á Selfossi, hefur lagt til við embætti vegamálastjóra að hámarkshraði á Biskupstungnabraut við Borg í Grímsnesi verði lækkaður úr 90 km hraða niður í 70 km hraða.

Eftir því sem segir á vefnum Suðurland.is hefur sveitarstjórn Grímsnes- og Grafningshrepps lýst yfir vonbrigðum yfir því hversu langan tíma hafi tekið að fá hámarkshraðanum breytt. Sveitarstjórn lagði fram tillögu þess efnis haustið 2005 eftir alvarlegt umferðarslys á gatnamótunum þar sem karlmaður lét lífið. Í síðasta mánuði lést síðan annar ökumaður í árekstri á vegkaflanum.

Þá vill sveitarstjórnin fjármagn frá samgönguyfirvöldum til að búa til hringtorg á gatnamótunum við Borg.