Auglýsingar með Lalla Johns gegn almennu velsæmi

Siðanefnd Sambands íslenskra auglýsingastofa hefur komist að þeirri niðurstöðu að auglýsing Öryggismiðstöðvarinnar með Lalla Johns hafi brotið gegn siðareglum sambandsins. Þátttaka Lalla Johns í auglýsingunum brjóti gegn almennu velsæmi og sé til þess fallin að höfða til ástæðulauss ótta almennings.

Auglýsingarnar voru sýndar á vordögum og ákvað Öryrkjabandalag Íslands að kæra auglýsingaherferðina til siðanefndar Sambands íslenskra auglýsingastofa. Vísaði Öryrkjabandalagið til siðareglna SÍA um að auglýsingar ættu ekki að brjóta gegn almennri velsæmiskennd og höfða að ástæðulausu til ótta fólks.

Siðanefndin klofnaði í afstöðu sinni til málsins. Taldi meirihlutinn, eða þrír nefndarmenn, að með auglýsingaherferðinni væri verið að nýta sér bágindi einstakrar persónu og því færi hún gegn almennri velsæmiskennd. Tveir nefndarmenn voru hins vegar á móti.

Hvað varðar athugasemdir um að verið væri að höfða að ástæðulausu til ótta fólks komst siðanefndin að því að með auglýsingunni væri verið að gefa í skyn að Lalli Johns myndi brjótast inn. Ástæðulaust væri að ógna almenningi með persónu Lalla með þessum hætti enda frekari ástæða til þess að óttast innbrot og glæpi almennt en Lalla Johns sem slíkan. Töldu fjórir nefndarmenn að auglýsingin færi gegn siðareglum SÍA. Var þeim tilmælum beint til Himins og hafs og Öryggismiðstöðvarinnar að stöðva allar birtingar auglýsinga með Lalla Johns.

Siðanefnd banni Lalla Johns að leika í auglýsingum

Fram kemur í tilkynningu frá Öryggismiðstöðinni vegna málsins að markmið auglýsinganna hafi verið að minna almenning á mikilvægi þess að huga að öryggi heimilisins fyrir sumarið. Lalli Johns hafi komið fram í auglýsingum í forvarnarskyni og reifað nokkur atriði sem vert væri að hafa í huga varðandi varnir heimilisins. Lýsir Öryggismiðstöðin furðu sinni á niðurstöðu siðanefndarinnar.

Bent er á að Lalli Johns hafi sjálfur samþykkt að leika í auglýsingunum og gengið hafi verið frá öllum samningum eins og hefð er fyrir. „Það að Siðanefndin banni Lalla Johns í raun að vinna fyrir sér með leik í auglýsingum hlýtur að orka tvímælis," segir í tilkynningu Öryggismiðstöðinni.

„Með það að markmiði að bæta vitund almennings um hættur og öryggisvarnir heimila útilokar Öryggismiðstöðin ekki frekari þátttöku einstaklinga sem hafa reynslu og þekkingu á því sviði í auglýsingum á vegum fyrirtækisins," segir enn fremur í tilkynningu Öryggismiðstöðvarinnar.