Laun ráðamanna og embættismanna hækkuðu um 2,6%

Kjararáð úrskurðaði fyrir skömmu að laun þeirra sem heyra undir ráðið myndu hækka þann 1. júlí s.l. um 2,6% að meðaltali. Laun nokkurra embættismanna voru einnig hækkuð um 3 launaflokka en það þýðir samsvarandi launahækkun. Í fyrstu frétt hér um málið urðu þau mistök að prósentu og launaflokkahækkun var lögð saman í dæmi lögreglustjórans á höfuðborgarsvæðinu. Er beðist velvirðingar á þeim mistökum.

Forseti Íslands, Ólafur Ragnar Grímsson, er launahæsti embættismaður þjóðarinnar og fær 1.771.000 kr. á mánuði eftir breytinguna. Geir H. Haarde forsætisráðherra fær 1.056.000 kr., aðrir ráðherra fá 953.000 kr. sem fyrr segir og þingmenn fá 531.000 kr. á mánuði.

Af öðrum embættismönnum sem heyra undir Kjararáð má nefna, lögreglustjórann á höfuðborgarsvæðinu, Stefán Eiríksson sem fær 864.000 kr. á mánuði, Biskup Íslands, Karl Sigurbjörnsson fær um 765.000 kr. á mánuði og Albert Jónsson sendiherra í Wasington fær 626.000 kr. á mánuði. Síðastnefnda talan er það sem sendiherrar Íslands fá séu þeir staðsettir erlendis. Séu þeir staðsettir hér innanlands bætast rúmlega 40.000 kr. við launin.

Laun flestra þeirra hafa verið ákveðin þannig að þau skiptast mánaðarlaun og fastar greiðslur fyrir yfirvinnu, svokallaðar einingar. Sendiherrar fá þó ekki greiddar yfirvinnueiningar meðan þeir eru við störf erlendis. Sýslumenn fá hluta launa sinna greiddan með hliðsjón af árangri þeirra við innheimtu tiltekinna skatta.

"Kjararáð hefur ákveðið að breyta nú samsetningu heildarlauna þannig að mánaðarlaun hækki, yfirvinnueiningum fækki og ákvæði um árangurstengdan hluta launa sýslumanna verði breytt. Með þessu hækkar hlutfall mánaðarlauna (dagvinnulauna) af heildarlaunum hjá öðrum en forseta Íslands, ráðherrum og alþingismönnum, en laun þeirra eru ákveðin með öðrum hætti." segir m.a. í ákvörðun Kjararáðs.