Jafnréttisskóli í burðarliðnum

Tillaga frá borgarfulltrúum Vinstrihreyfingarinnar græns framboðs um undirbúning að stofnun Jafnréttisskóla var samþykkt samhljóða í borgarstjórn í dag, 19. maí. Í tillögunni segir að borgarstjórn Reykjavíkur samþykki að setja á stofn samráðshóp sem hafi það verkefni að kanna kosti þess að stofna Jafnréttisskóla. Jafnréttisskólinn á að hafa það að markmiði að efla þekkingu og vitund barna og ungmenna á jafnréttismálum í samstarfi við þau félagasamtök og stofnanir sem starfa að jafnréttismálum.

Samráðshópurinn á að skila niðurstöðum eigi síðar en 1. janúar 2008, enda skuli stefnt að því að Jafnréttisskólinn hefji störf á haustmánuðum 2008.

Í greinargerð frá borgarfulltrúum VG segir að Jafnréttisskólinn hafi fyrst og fremst það hlutverk að „skapa vettvang fyrir heilsteypt jafnréttisstarf í skólum og frístundastarfi í anda mannréttindastefnu borgarinnar," Einnig skal stefnt að því að efla tengsl meðal kennara og styrkja þá jafnréttisfræðslu sem þegar er til staðar bæði í skólakerfinu og í frístundastarfi barna og ungmenna í borginni.

„Lög um jafna stöðu og jafnan rétt kvenna og karla gera ráð fyrir að fræðsla um jafnréttismál fari fram á öllum skólastigum, en námsefni og tæki til verksins eru af skornum skammti. Stofnun Jafnréttisskólans væri því mikill fengur fyrir kennara og myndi styrkja grunnskóla Reykjavíkur enn frekar. Jafnframt væri þetta skref enn eitt merki þess að Reykjavíkurborg er í fararbroddi sveitarfélaga á sviði mannréttinda," segir ennfremur.

Greinargerðinni lýkur síðan á eftirfarandi orðum: „Það er vel við hæfi að 19. júní sé lögð fram tillaga af þessu tagi og þar með undirstrikað mikilvægi þess að halda áfram öflugri uppbyggingu jafnréttissjónarmiða á öllum sviðum í þjónustu og stjórnsýslu borgarinnar. Það er jafnframt við hæfi að samþykkja slíka stefnumótandi tillögu nú á þessum degi og væri borgarstjórn Reykjavíkur til sóma."