Skerðir möguleika á byggingu nýrra álvera

Landsvirkjun hefur ákveðið að hætta öllum viðræðum um sölu á raforku til nýrra álvera á suðvesturlandi og ræða þess í stað við netþjónafyrirtæki og fyrirtæki á sviði kísilhreinsunar fyrir sólarrafala. Ákvörðunin hefur afgerandi áhrif á möguleika byggingu nýrra álvera á suðvesturhorninu.

Undanfarin misseri hefur Landsvirkjun átt í viðræðum við aðila sem hafa áhuga á að byggja ný álver í Helguvík, Þorlákshöfn og Keilisnesi varðandi sölu á raforku frá væntanlegum virkjunum í Þjórsá. Þar verður samtals hægt að virkja um 250 megavött. Stjórn Landsvirkjunar hefur nýverið átt í könnunarviðræðum við fimmtán aðila sem hafa áhuga á að kaupa raforku af fyrirtækinu en í morgun ákvað stjórnin að setja allar viðræður sem tengjast nýjum álverum á Suðvesturlandi í salt.

Friðrik Sophusson forstjóri Landsvirkjunar segir að stjórn fyrirtækisins vilji láta á það reyna hvort það fái kaupendur í nýjum greinum, eins og t.d. netþjónabú eða kísilhreinsun fyrir sólarrafhlöður, á betra verði en býðst hjá nýjum álverum í dag.

Landsvirkjun gefur ekki upp að svo stöddu hvaða aðilar þetta eru en reiknar með að niðurstöður geti fengist í þær viðræður á næstu mánuðum. Ef af verður munu þessi tvö fyrirtæki fyrst um sinn nýta um 100 megavött af þeim 250 sem fást úr Þjórsárvirkjunum, sem þá yrði virkjuð í áföngum. Friðrik segir að sala til þessara aðila myndi auka fjölbreytnina í hópi kaupenda orku Landsvirkjunar og áhætta fyrirtækisins minnkaði. Þá greiði þessir aðilar hærra verð fyrir orkuna en álfyrirtækin.

Friðrik segir þessa aðila bjóða talsvert hærra verð. Þeir komi úr annars konar umhverfi en álfyrirtækin. Netþjónabúin séu oftast í stórborgum þar sem þau greiði hærra verð en jafnvel sé í boði hér.

Landsvirkjun hefur kynnt stjórnvöldum ákvörðun sína og þannig átti forstjóri fyrirtækisins fund með Geir H. Haarde forsætisráðherra á þriðjudag.

Ákvörðun Landsvirkjunar í morgun er tímamótaákvörðun. Fyrirtækið er í raun í fyrsta skipti í þeirri stöðu að eftirspurn eftir raforku er meiri en framboðið. Forstjóri Landsvirkjunar segir að ekki sé verið að láta undan pólitískum þrýstingi.

"Okkar ákvörðun er fyrst og fremst efnahagsleg. Hún byggir á því að við teljum að þetta sé betra fyrir Landsvirkjun, vegna þess að þetta gefur hærra verð. Við teljum líka, vegna þess að við seljum mjög mikið til álvera, sem eru góðir samningar sem við höfum í dag - en við teljum samt að það sé mikilvægt að dreifa áhættunni," segir Friðrik.

Þessi ákvörðun hefur ekki áhrif á mögulega byggingu álvers á Húsavík sem fengi alla sína orku af Norðurlandi. Þá mun Landsvirkjun áfram ræða við þegar starfandi álver á á Grundartanga og í Straumsvík ef þau þurfa aukna orku vegna stækkunar á núverandi starfsemi.