Raforkan úr Þjórsá fer ekki til álvers

Landsvirkjun hefur tekið ákvörðun um að raforkan sem fæstu með virkjun í neðri hluta Þjórsár fari annað hvort til netþjónabúa eða til kísilhreinsunar. Landsvirkjun segir ljóst að eftirspurn sé langt umfram framboð og því sé ekki hægt að mæta óskum allra og því hafi verið ákveðið að hefja ekki viðræður við álframleiðendur.

Raforkukaupendurnir sem rætt hefur verið við hingað til stunda fjölbreytta starfsemi, svo sem álvinnslu, kísilvinnslu, hreinsun kísils fyrir sólarrafala og rekstur netþjónabúa. „Stjórn Landsvirkjunar telur mikilsvert að fyrirtækið fái sem hæst verð fyrir raforkuna, dreifi áhættu og auki fjölbreytni viðskiptavina sinna," segir í tilkynningu frá fyrirtækinu.

„Landsvirkjun hefur því ákveðið að hefja viðræður um raforkusölu við fyrirtæki sem hyggjast byggja upp netþjónabú á Íslandi. Einnig eru í undirbúningi viðræður við fyrirtæki á sviði kísilhreinsunar fyrir sólarrafala." Landsvirkjun segir ekki hægt að greina frá því um hvaða fyrirtæki sé að ræða en segir að líkega verði starfssemin staðsett á Suðurlandi eða Reykjanesi.

„Áhersla Landsvirkjunar á netþjónabú og sólarkísil byggist á því að vænta má hærra raforkuverðs í þeim viðskiptum en við aðra stórkaupendur. Landsvirkjun mun þess vegna ekki ganga til samningaviðræðna að sinni við fyrirtæki sem hyggja á bygginu nýrra álvera á Suður- eða Vesturlandi."

Þá segir að „rafmagni úr þeim virkjunum sem eru í undirbúningi í Þjórsá telur Landsvirkjun að verði best ráðstafað í þágu starfsemi af þeim toga sem að ofan er lýst ásamt hugsanlega aukinni sölu til álvera sem þegar eru starfandi í landinu." Undirbúningi virkjana í Þjórsá miðar vel áfram að því er fram kemur „þannig að framkvæmdir gætu hafist á seinni hluta næsta árs ef allt gengur eftir."