Sex árekstrar á fimmtíu mínútum

Sex árekstrar urðu á níunda tímanum í höfuðborginni í morgun og leiddu þeir til allnokkurra tafa í morgunumferðinni.

Sá fyrsti varð í Ártúnsbrekkunni laust laust klukkan átta en þar rákust fimm bílar saman í aftanákeyrslum. Tveimur mínútum síðar fékk lögregla svo tilkynningu um þriggja bíla árekstur á Kringlumýrarbraut og sjö mínútum eftir það rákust tveir bílar saman á Kringlumýrarbraut til móts við Borgtartún.

Um tuttugu og fimm mínútur liðu þar til tilkynnt var um fjórða áreksturinn, í þetta sinn á Vesturlandsvegi til móts við Grafarvogsbrú tuttugu mínútur í átta. Tveir minni háttar árekstrar urðu svo með mínútu millibili á Hringbraut og Kringlumýrarbraut laust fyrir klukkan níu. 

Þegar leitað var skýringa á þessum mikla fjölda hjá lögreglunni sagði hún að birtuskilyrði geta hugsanlega skýrt þetta, en dimmt er nú orðið á morgnana og við bættist úrkoma í morgun.

Lögregla hafði því í nógu að snúast í morgun en hún var enn fremur kölluð til ásamt sjúkrabíl laust fyrirt klukkan átta þegar maður missti framan af fingri í vinnuslysi í Hafnarfirði. Tildrög slyssins liggja ekki fyrir.