Fundu landaverksmiðju í Þorlákshöfn

Lögreglan á Selfossi handtók í gær karlmann af erlendum uppruna eftir að 140 lítrar af landa og 75 lítrar af gambra fundust heimili hans í Þorlákshöfn í gær.

Fram kemur í tilkynningu frá lögreglunni á Selfissi að við frumprófun hafi styrkur landans reynst 44 prósent. Lögreglan lagði hald á bruggið og situr maðurinn sem handtekinn var nú í fangageymslu. Hann verður yfirheyrður í dag þegar náðst hefur í túlk. Að sögn lögreglunnar var farið í aðgerðina vegna ábendinga um að maðurinn stundaði landasölu í Þorlákshöfn og var aðgerðin í höndum almennrar deildar lögreglunnar á Selfossi.

Þetta er eitt mesta magn af tilbúnum landa sem lögreglan á Selfossi hefur gert upptækt í einni húsleit en þar á bæ segja menn að það sé orðið mun sjaldgæfara en áður að lagt sé hald á landa. Samkvæmt samtali við lögreglumann á Selfossi þarf að fara aftur til ársins 2001 til þess að finna viðlíka dæmi um landaframleiðslu sem upp kemst um.