Fyrirtæki sýknað af ákæru um brot gegn hvíldartíma ökumanna

Héraðsdómur Suðurlands hefur sýknað flutningafyrirtæki af ákæru um að hafa brotið gegn lögum um hvíldartíma ökumanna á grundvelli óskýrrar refsiheimildar í lögum.

Bæði félagið og ökumaður vöruflutningabíls voru ákærð fyrir umferðalagabrot með því að virða ekki hvíldartíma ökumanna nokkra daga í ágúst og september í fyrra. Ökumaðurinn játaði sök og gekkst undir viðurlagaákvörðun í september síðastliðnum.

Félagið neitaði hins vegar sök og sagðist engan hagnað hafa haft af því að maðurinn hefði ekið umfram leyfilegan aksturstíma. Því hafnaði dómurinn en komst hins vegar að því að verknaðarlýsing í reglugerð sem ákæruvaldið vísaði til væri allt önnur en verknaðarlýsing í umferðarlögum og því væri ekki skýr refsiheimild fyrir hendi. Var félagið því sýknað og sakarkostnaður felldur á ríkið.