Öryggismál á ítölskum knattspyrnuvöllum í ólestri

Öryggismál á knattspyrnuvöllum á Ítalíu eru víða í ólestri að sögn Geirs Þorsteinssonar, formanns Knattspyrnusambands Íslands. Geir segir óljóst hvaða afleiðingar skotárásin í dag kemur til með að hafa.

„Lögreglan á Ítalíu hefur lengi átt í erfiðleikum með knattspyrnubullur,," sagði Geir Þorsteinsson, formaður Knattspyrnusambands Íslands, í samtali við Vísi. „Þetta er mikið vandamál á Ítalíu og þeir eru að sumu leyti mörgum árum á eftir þjóðum í Norður-Evrópu hvað varðar öryggismál í kringum knattspyrnuleiki."

Ítalska lögreglan skaut knattspyrnuáhanganda til bana eftir að til átaka kom milli stuðningsmanna Juventus og Lazio nálægt borginni Arezzo í dag. Í kjölfar skotárásarinnar kom til átaka milli lögreglu og áhorfenda á knattspyrnuleikvanginum í Bergamo. Tveir lögreglumenn særðust í átökunum en leiknum var aflýst.

Geir segir erfitt að spá fyrir um hvaða afleiðingar atburðirnir í dag kunna að hafa á knattspyrnuna. „Knattspyrnusamband Evrópu mun væntanlega fjalla um þetta mál. En það er erfitt að segja hvað afleiðingar þetta kann að hafa. Þetta er vandamál sem ítalska lögreglan og ítalska knattspyrnusambandið þurfa að takast á við. Þeir þurfa að byggja upp leikvanga sína og taka á þessum öryggismálum."