Ekki verið stoltari síðan ég fékk íslenskan ríkisborgararétt

„Ég hef ekki verið jafnstoltur síðan ég fékk íslenkan ríkisborgararétt," segir Paul Nikolov, varaþingmaður Vinstri - grænna, sem í dag tók sæti á Alþingi, fyrstur innflytjenda. Paul situr á þingi í stað Árna Þórs Sigurðssonar sem staddur er erlendis í opinberum erindagjörðum.

Aðspurður hvort hann myndi láta til sín taka í umræðum á þingi á næstu tveimur vikum sagði Paul að það kæmi í ljós. Hann væri rétt að kynnast starfinu en sér litist til að mynda vel á frumvarp sem heilbrigðisráðherra mælti fyrir í dag um tæknifrjógvanir, en það miðar að því að heimila nýtingu stofnfrumna til rannsókna og lækninga.

Aðspurður hvaða mál hann hyggist leggja fram á þingi segir Paul að hann vilji leggja fram frumvarp um að afhenda þeim útlendingum sem hingað koma til að vinna atvinnuleyfi í stað þess að láta fyrirtæki fá þau. Paul segir þetta grundvallarmannréttindi og að það eigi vera hluti af stefnu ríkisstjórnarinnar að allir hafi sömu réttindi til vinnu. Allir sem hingað komi eigi að hafa frelsi til þess að vinna þar sem þeir vilji.