Á 123 km hraða með sex daga gamalt ökuskírteini

Sautján ára ökumaður með sex daga gamalt ökuskírteini var gripinn á 123 kílómetra hraða í Ártúnsbrekkunni við eftirlit lögreglunnar um helgina.

Þá var jafnaldri hans gripinn á 130 kílómetra hraða á Gullinbrú. Bent er á í tilkynningu lögreglunnar að allmargir ökumenn hafi verið staðnir að hraðakstri um helgina og í flestum tilvikum var um að ræða unga menn með ökuskírteini til bráðabirgða.

Eldri og reyndari ökumenn komu líka við sögu í þessu umferðareftirliti lögreglunnar og þannig var karlmaður á fertugsaldri stöðvaður eftir að hann ók á 128 kílómetra hraða, eða rúmlega tvöföldum hámarkshraða, á Sæbraut. Annar ökumaður, nálægt þrítugu, var tekinn á Reykjanesbraut á 108 km hraða en í þokkabót reyndist viðkomandi vera ölvaður.