Lá við stórslysi um borð í Norrænu

Litlu mátti muna að stórslys yrði þegar ferjan Norræna varð vélarvana í gær í miklu óveðri á hafsvæðinu á milli Noregs og Hjaltlands.

Greitn er frá málinu á InterSeafood.com en samkvæmt heimildum vefsíðunnar var haugasjór og mikill öldugangur á svæðinu.Skipið varð vélarvana í ólgusjó eftir að straumi sló út en áhöfninni tókst að koma hjálparvélum í gang og síðan aðalvélinni sjálfri.

Svo mikill var sjógangurinn að skrúfa skipsins fór upp úr sjónum og við það fór hún á yfirsnúning og straumi sló út. Um 20 mínútur tók að koma straumi á að nýju en á meðan valt skipið eins og korktappi á sjónum undan óveðrinu.

Stöðugleikabúnaður skipsins skemmdist en þess má geta að ekki er langt síðan að gert var við þann búnað eftir óhapp sem varð í óveðri fyrr á árinu.

Að sögn Portal.fo skemmdust einnig bílar og gámar um borð í Norrænu. 244 farþegar voru um borð í skipinu í ferðinni frá Björgvin í Noregi til Hjaltlands og í áhöfn eru 81 skipverji. Ferjan er nú á leið til Hjaltlands en þaðan verður siglt til Færeyja.