Verktaki segir villimenn búa á Hverfisgötu 42

Sigurjón Halldórsson einn eigenda SR-verktaka segir að það séu villimenn sem búi í húsinu að Hverfisgötu 42 og í grennd við það. Þeir hafi rifið á brott girðingu í kringum svæðið sem sé vinnusvæði verktakana, brotið rúður í húsum á svæðinu og stolið búnaði.

Þrátt fyrir að nær mánuður er liðinn síðan húsið á Hverfisgötu 44 var flutt á brott eru enn um 3 tonn af undnum og niðurbútuðum stálbitum á næstu lóð við hliðina. Þetta stál er ekki girt af og getur verið hættulegt ef einhver vegfarandi hrasar um það. Stálið eru leyfar af flutningi á fyrrgreindu húsi og því í eigu SR-verktaka.

Lúðvík Gústafsson mengunnarfulltrúi borgarinnar segir að hann hafi beðið SR-verktaka um að fjarlægja þetta stál enda er það lítið augnayndi og geti verið hættuelgt. "Ég á ekki von á öðru en farið verði eftir þeim óskum mínum," segir Lúðvík

Sigurjón Halldórsson segir aftur á móti að stálið sé á núverandi vinnusvæði SR-verktaka og ætlunin að nota það við niðurrif á húsunum sem standa á lóðinni. Lúðvík hafi því ekkert um málið að segja.

"Við girtum þetta svæði af eins og reglur gera ráð fyrir," segir Sigurjón. "Girðingin var hinsvegar rifin niður mjög fljótlega, að því er virðist til að geta lagt bílum á lóðinni."