Innlent

Aldrei fleiri útskrifaðir úr námi á háskólastigi

Aldrei hafa fleiri útskrifast úr námi á háskólastigi á einu skólaári en skólaárið 2005-2006 samkvæmt tölum Hagstofunnar. Þá útskrifuðustu rúmlega 3360 manns með nærri 3.390 próf. Það voru nærri 16 prósentum fleiri en árið áður. Brautskráðum konum fjölgaði um rúmlega 280 en körlum um rúmlega 170 og eru konur tveir þriðju þeirra sem útskrifuðust með próf á háskólastigi. Þeir sem útskrifuðust á þarsíðasta skólaári voru allt frá 19 ára til 75.

Tölur Hagstofunnar leiða enn fremur í ljós að aldrei hafa fleiri útskrifast með doktorspróf á einu skólaári, eða 15 nemendur, 7 karlar og 8 konur. Árið áður voru 14 doktorar brautskráðir. Sama má segja um meistaragráðu en rúmlega 410 luku meistaranámi skólaárið 2005-2006 sem var 120 mönnum fleira en árið áður.

Þegar horft er til framhaldsskóla útskrifuðust rúmlega 4800 nemendur af framhaldsskólastigi skólaárið 2005-2006 og hafa aldrei verið fleiri. Aukningin milli ára nemur þó aðeins 0,7 prósentum. Konur voru nokkru fleiri en karlar eða 52,5 prósent brautskráðra nemenda.

Brautskráningar úr ýmiss konar starfsnámi á framhaldsskólastigi voru 2.843. Flestir ljúka námi á sviðunum framleiðsla og mannvirkjagerð eða 1.159, en þar á meðal flokkast flestar iðngreinar. Næstflestir luku námi í þjónustugreinum, eða 500 talsins. Brautskráðir nemendur með sveinspróf voru 609, 12 fleiri en skólaárið 2004-2005.

Mest lesið


Fleiri fréttir

Sjá meira


×

Mest lesið