Telur rifta eigi samningi REI og GGE

Steingrímur J. Sigfússon, formaður Vinstrihreyfingarinnar - græns framboðs, telur að rifta eigi samrunasamningi REI og Geysis Green Energy. Menn eigi ekki að komast upp með slík vinnubrögð og málið eigi að fara aftur á byrjunarreit.

Valgerður Sverrisdóttir, varaformaður Framsóknarflokksins, og Steingrímur J. Sigfússon, formaður Vinstrihreyfingarinnar - græns framboðs, voru gestir Sigmundar Ernis Rúnarssonar í þættinum Mannamáli sem sýndur var á Stöð 2 í gærkvöld.

Steingrímur sagði aðspurður hvort rifta ætti samningi REI og Geysis Green Energy að hann teldi að það ætti að spóla ofan af málinu og koma því algjörlega á byrjunarreit. „Mér liggur við að segja að það sé uppeldislegt atriði, bæði fyrir viðskiptalífið á Íslandi og fyrir stjórnmálalífið á Íslandi, að menn komist ekki upp með svona vinnubrögð," sagði Steingrímur.

Valgerður Sverrisdóttir sagði aðspurð um hvort ekki ætti að rifta samningnum og byrja upp á nýtt að almennt væru það ekki góðir viðskiptahættir að rifta samningum nema það væri ólöglega til þeirra stofnað. Þetta þyrfti að skoða og sérstakur hópur hefði verið myndaður til þess að gera það.