Forstöðumaður Fjöliðjunnar segir upp

Forstöðumaður Fjöliðjunnar hefur sagt starfi sínu lausu en unnið er að úttekt á fjárreiðum félagsins. Grunur leikur á um að ekki sé allt með felldu í þeim efnum og hefur Ríkisendurskoðun verið fengin til aðstoðar við að kanna bókhaldsgögn.

Fjöliðjan er vinnustaður fyrir fatlaða á Akranesi og heyrir undir Svæðisskrifstofu Vesturlands. Magnús Þorgrímsson framkvæmdastjóri svæðiskrifstofunnar staðfesti í samtali við Vísi að forstöðumaðurinn hefði sagt upp og hætt samdægurs. Hann sagði ekki annað að frétta af málinu í bili.

Sigurður Þórðarson ríkisendurskoðandi segir í samtali við Vísi að þeir reiknuðu með að fá bókhaldsgögnin í hendurnar í þessari viku. "Ég reikna með að niðurstöður okkar liggi fyrir öðru hvoru meginn við næstu helgi," segir Sigurður.

Eins og fram hefur komið í fréttum á Vísi er forstöðumaðurinn fyrrum gjaldkeri ÍA en félagið hefur kært hann fyrir fjárdrátt.