Lögðu hald á fíkniefni og hníf

Lögreglan á höfuðborgarsvæðinu handtók í nótt karlmann á þrítugsaldri vegna gruns um akstur undir áhrifum fíkniefna. Við nánari leit í bifreið mannsins fundust ætluð fíkniefni og hnífur. Lögreglan lagði hald á hvorttveggja.

Alls voru fjórir teknir um helgina vegna gruns um akstur undir áhrifum fíkniefna. Þrír karlar og ein kona en þau eru öll á þrítugsaldri. Konan var stöðvuð á laugardagskvöldið en hún var á stolnum bíl.

Þá voru tólf ökumenn teknir fyrir ölvunarakstur um helgina. Sex voru stöðvaðir á laugardag og jafnmargir á sunnudag. Sjö voru teknir í Reykjavík, fjórir í Kópavogi og einn í Garðabæ. Um var að ræða níu karla á aldrinum 21 til 40 ára og þrjár konur, 18, 24 og 52 ára.