Samkeppnishæfni Íslands minnkar

Ísland fellur um þrjú sæti, úr því tuttugasta í það tuttugasta og þriðja, á lista World Economic Forum, eða Alþjóðlegu efnahagsstofnuninni, yfir samkeppnishæfni landa sem mæld er með samkeppnisvísitölu.

Þetta kemur fram í tilkynningu frá Nýsköpunarmiðstöð Íslands sem er samstarfsaðili stofnunarinnar hér á landi. Þar kemur einni fram að Bandaríkin, Sviss, Danmörk og Svíþjóð standa best að vígi þegar kemur að samkeppnishæfni.

Styrkur Íslands er sagður liggja meðal annars í sterkri stöðu hvað varðar grunnmenntun og tæknilegan viðbúnað en efnahagsskilyrði og stærð heimamarkaðar veikja stöðu landsins.