Umdeilt heimili fyrir heimilislausa opnað - Nágrannar á Njálsgötu ánægðir

"Þetta hefur allt gengið mjög vel," segir Hildigunnur Halldórsdóttir fiðluleikari og íbúi við Njálsgötu en hún býr beint á móti nýopnuðu heimili fyrir heimilislausa í götunni. Óhætt er að segja að heimilið sé afar umdeilt en margir íbúar við Njálsgötu mótmæltu því harðlega að það yrði opnað á sínum tíma.

Nú, rúmum tveimum vikum eftir að hið umdeilda heimili opnaði loks, ber ekkert á ónæði af starfseminni. Það er að minnsta kosti skoðun þeirra nágranna sem Vísir ræddi við í dag.

Kristín Helga Káradóttir, íbúi við Njálsgötu segir að hinir nýju nágrannar séu eins og hverjir aðrir nágrannar í götunni. "Ég mundi segja að þetta gangi mjög vel," segir Kristín. Hún segist ekki hafa orðið var við neitt ónæði vegna heimilisins og bætir við að hún hafi ekki skilið þá reiði sem blossaði upp vegna málsins á sínum tíma.

"Ég er þeirrar skoðunnar að þessir menn eigi alveg jafn mikinn rétt á að búa þarna og við hin," segir hún.

Hildigunnur Halldórsdóttir er sama sinnis. "Ég hef ekki orðið var við neitt ónæði. Það er allt rólegt og fínt hérna í götunni," segir hún.

Ekki náðist í forsvarsmenn Velferðarsviðs Reykjavíkurborgar í dag.