Telur Hverahlíðarvirkjun ekki hafa umtalsverð umhverfisáhrif

Umhverfisstofnun telur ekki að Hverahlíðarvirkjun, sem ætlunin er að reisa á Helliheiði, muni hafa umtalsverð umhverfisáhrif í för með sér. Þetta kemur fram í umsögn stofnunarinnar um mat á umhverfisáhrifum virkjunarinnar.

Orkuveitan áformar að reisa jarðgufuvirkjun í Hverahlíð og mun hún framleiða allt að 90 megavött af raforku. Umhverfisstofnun bendir á að virkjanasvæðið liggi í suðurjaðri mannvirkjabeltis á Hellisheiði þar sem þjóðvegur eitt sé meðal annars og að fylgjast verði með losun og dreifingu bennisteinsvetnis frá virkjuninni en það er talið heilsuspillandi í miklu magni. Grípa þurfi til mótvægisaðgerða eins og að hreinsa gufuna og vakta áhrif virkjana á viðkvæman gróður.

Þá segir Umhverfisstofnun að sjónræn áhrif virkjunarinnar verði nokkur en hönnun marnnvirkja og staðsetning ráði miklu þar um.