Flugmálayfirvöld hætta að útbýta pokum undir vökvaílát

Flugvallaryfirvöld á Keflavíkurflugvelli hafa hætt að dreifa plastpokum undir vökvaílát í handfarangri og verður það nú í höndum verslana Flugstöðvarinnar að útvega flugfarþegum þá.

Fram kemur á heimasíðu Flugmálastjórnar á Keflavíkuflugvelli að vegna alþjóðlegra flugöryggisreglna sem settar voru á síðasta ári þurfi að setja vökvaílát í handfarangri í eins lítra plastpoka með rennilás.

Að sögn Friðþórs Eydal, upplýsingafulltrúa Flugmálastjórnar, útbýttu flugmálayfirvöld pokunum á meðan verslanir í fríhöfninni voru að aðlagast hinum nýju reglum.

Segir Friðþór að nálgast megi pokana í matvöruverslunum í fríhöfninni, þar á meðal 10-11 í komusal á jarðhæð flugstöðvarinnar. Þær upplýsingar fengust í þeirri verslun að þar væri ekki rukkað fyrir pokana.