Hjólin tekin að snúast á ný á Flateyri

Fiskvinnslan Eyraroddi hefur fest kaup á sjö hundruð tonnum af þorski á alþjóðlegum mörkuðum og er vinnsla komin í fullan gang á ný á Flateyri.

Áður var fiskvinnslan Kambur með starfsemi í húsi Eyrarodda. Eigendur Kambs ákváðu síðast vor að loka og selja bæði eignir og aflaheimildir sínar. Fréttirnar voru reiðarslag fyrir íbúa bæjarins en hundrað og tuttugu manns störfuðu hjá fyrirtækinu. Fyrirtækið Oddatá festi síðar kaup á fasteignum og tækjum Kambs og ákveðið var að hefja saltfiskvinnslu á ný undir nafninu Eyraroddi. Stór hluti þeirra sem missti vinnunni flutti burt frá Flateyri en um þriðjungur var ráðinn til starfa hjá Eyrarodda.

Eyraroddi á engan kvóta en fyrirtækið kaupir meðal annars þorsk í miklu magni á alþjóðlegum mörkuðum og flytur hingað til lands. Nú þegar hafa verið fest kaup á sjö hundruð tonnum en megnið er keypt af Rússum og Grænlendingum. Kristján Erlingsson, stjórnarformaður Eyrarodda, segir fyrirtækið búið að tryggja sér hráefni fram í janúar.

Megnið af fisknum sem Eyraroddi vinnur er fluttur til Spánar og því hægt að velta því fyrir sér hvort það hreinlega borgi sig að flytja fisk hingað til lands, vinna hann hér og flytja hann aftur út. Kristján vonast til að gengið hafi verið þannig frá málum að ekki verði tap á rekstrinum. Hann segir ljóst að það sé ekki auðvelt að tryggja það en það sé engu að síður hægt.